‘निसर्ग पर्यावरण मित्र 2020’ पुरस्काराने सुरभी स्वयंसेवी संस्था सन्मानित

‘निसर्ग पर्यावरण मित्र 2020’ पुरस्काराने सुरभी स्वयंसेवी संस्था सन्मानित
अलिबाग/प्रतिनिधी
सुरभी संस्थेला राज्यस्तरीय निसर्ग पर्यावरण मित्र पुरस्कार ज्येष्ठ साहित्यिक व माजी मराठी साहित्य संमेलनाचे अध्यक्ष डॉ श्रीपाल सबनीस यांच्या हस्ते दौंड-पुणे येथे सुप्रिया जेधे, शितल रणसिंग, प्रतिक्षा रणसिंग व संचालक मंडळ यांना देण्यात आला. स्व. रोहिणी जाधव स्मारक ट्रस्ट, दौंड या संस्थेच्यावतीने दरवर्षी विविध सामाजिक संस्थाना पर्यावरण व रक्तदाते एडस् जनजागृती संस्था यांना पुरस्काराने सन्मानित करण्यात येते. भिकार्‍यांचे डॉक्टर डॉ. अभिजीत व डॉ. मनिषा सोनावणे,  मुक्तांगण संस्था पुणे यांना देखिल सन्मानित करण्यात आले.
सुरभी संस्था ही रायगड जिल्हा व कोकणात कार्यरत असून, निसर्ग-पर्यावरण या विषयावर प्रामुख्याने गेली 12 वर्ष विविध मार्गाने काम करीत आहे. ग्रामीण भागामध्ये वनराई बंधारे बांधणे, पाणी सर्वेक्षण करणे, बीज संकलन करुन त्याचे रोपे तयार करणे व दरवर्षी ओसाड माळरानावर वृक्षारोपण करणे व झाडे जगविणे आदी उपक्रम जिल्ह्यातील शाळा-महाविद्यालये यांच्या सहकार्याने दरवर्षी राबविली जातात. विद्यार्थ्यांना निसर्ग, पर्यावरण रक्षणाचे प्रबोधन केले जाते. 7 जून 2015 रोजी राज्याचे मुख्यमंत्री देवेंद्रजी फडणवीस ह संस्थेच्या वृक्षारोपण मोहिमेत सामिल झाले होते.
 फटाके विरोधी अभियान व प्रदूषण मुक्त गांव व शाळा या अंतर्गत संस्था जिल्ह्यातील विविध गावांमध्ये विद्यार्थ्यांच्या सहकार्याने घोषवाक्ये, पथनाट्याद्वारे रॅली काढून प्रबोधन केले जाते. अलिबाग, थळ, किहिम व इतर समुद्र किनारी दरवर्षी स्वच्छता  मोहिम राबविली जाते. होळीच्या निमित्ताने स्वच्छता अभियान राबविले जाते. स्वच्छ भारत अभियान अंतर्गत रायगड जिल्ह्यात सार्वजनिक शौचालये बांधण्यात आले.